Minisiteri y’Ubuzima itangaza ko abantu bane bari barwaye Coronavirus basezerewe mu bitaro basubira mu miryango yabo kuko bakize icyo cyorezo.
- Abantu bane bari barwaye COVID-19 basezerewe
Abo bakize bari barwariye hamwe n’abandi ku kigo nderabuzima cya Kanyinya, ahasanzwe hakirirwa abantu bose baba bagaragaweho n’ubwo burwayi.
Kubasezerera bikaba byakozwe kuri iki cyumweru tariki 5 Mata 2020, nk’uko www.kigalitoday.com yabihamirijwe n’umukozi wa Minisiteri y’Ubuzima ushinzwe imikoranire n’itangazamakuru, Julien Mahoro Niyingabira.
Mu ntangiriro z’iki cyumweru ni bwo Minisitiri w’Ubuzima, Dr. Ngamije Daniel, yari yavuze ko abantu ba mbere bakize iyo ndwara bagombaga gutaha hagati muri iki cyumweru, ari byo byakozwe hasezererwa abo bane.
Icyo gihe Minisitiri Ngamije yavuze ko kuba hari abagombaga gutaha ari inkuru nziza ku Rwanda mu guhangana n’icyo cyorezo kibangamiye isi muri rusange.
Kugeza ubu mu Rwanda abanduye coronavirus ni abantu 102, abayikize ni bane, ikaba nta muntu n’umwe irahitana.
- Abasezerewe bahise bajya mu miryango yabo
