Minisiteri y’Ubuzima iratangaza ko kuri uyu wa Kane tariki 04 Kamena 2020 mu Rwanda habonetse abandi barwayi bashya cumi na batatu ba COVID-19 bituma abamaze kuboneka mu Rwanda banduye icyo cyorezo bose hamwe baba 410.
Abo bantu cumi na batatu babonetse mu bipimo 1,369 byafashwe uyu munsi, ibipimo byose hamwe bimaze gufatwa bikaba ari 72,510 ari na byo byabonetsemo abarwayi 410.
Minisiteri y’Ubuzima ibinyujije kuri Twitter, yasobanuye ko ku wa Kane na mbere yaho ku wa Gatatu abarwayi bashya bagaragaye mu Karere ka Rusizi, bashyirwa mu kato n’abo bahuye bahita bakurikiranwa.
Itangazo rya Minisiteri y’Ubuzima riravuga ko abantu icyenda mu bari barwaye COVID-19 bakize ku wa Kane, abamaze gukira bose hamwe baba 280.
Abakirwaye COVID-19 mu Rwanda ni 128, kugeza kuri uyu wa Kane icyo cyorezo mu Rwanda kikaba kimaze guhitana abantu babiri.
Umurwayi wa kabiri yitabye Imana ku wa Kabiri tariki 02 Kamena 2020.
Minisiteri y’Ubuzima yatangaje ko umurwayi witabye Imana yari Umupolisikazi w’imyaka 24 y’amavuko wari mu butumwa bw’akazi mu mahanga, akaba ari na ho yanduriye Coronavirus, aza kugarurwa mu Rwanda amaze kuremba.
Ngo yahise yitabwaho n’abaganga ariko aza kwitaba Imana bitewe n’uko yari arembye cyane.
Tariki 30 Gicurasi 2020 nibwo Minisiteri y’Ubuzima mu Rwanda yatangaje ko umuntu wa mbere yitabye Imana azize COVID-19.
Uwo murwayi wa mbere witabye Imana yari umushoferi w’imyaka 65 y’amavuko wari utuye mu gihugu cy’abaturanyi wahisemo gutaha mu Rwanda nyuma yo kuremba.
Minisiteri y’Ubuzima ivuga ko uwo muntu wa mbere yitaweho n’abaganga mu kigo cyagenewe kuvura Coronavirus, ariko aza gupfa azize kwangirika imyanya y’ubuhumekero.
Minisiteri y’Ubuzima isaba abantu gukomeza gukurikiza inama bagirwa zo kwirinda COVID-19 zirimo gukaraba intoki n’amazi ndetse n’isabune cyangwa bagakoresha umuti wabugenewe, kwambara agapfukamunwa uko bikwiye, kwirinda gusuhuzanya abantu bahana ibiganza, kwirinda kujya ahantu hateraniye abantu benshi, no guhana intera hagati y’umuntu n’undi.
Hari na nimero ya 114 itishyurwa umuntu ahamagaraho agahabwa ubufasha mu gihe abonye ibimenyetso bya Coronavirus birimo umuriro, inkorora, kubabara mu muhogo no kwitsamura.
