Umuraperi ukunzwe mu Rwanda muri iki gihe nyuma y’igihe kininiyari abafana be baramubuze , akomeje kuvugwaho byinshi aho yashyize ukuri ahagaragara avugako atasibye amajwi ya Bruce Melodie mu ndirimbo ye “My Type” yumvikanamo mu nyikirizo(Chorus.)
Amakuru yavugaga ko Bruce Melodie yananije Danny Nanone bari bakoranye indirimbo yitwa ‘My type’ bikarangira uyu muraperi agize umujinya agahita ayisibamo uyu muririmbyi.
Icyakora nubwo abakunzi ba Danny Nanone bari batangiye kwikoma Bruce Melodie bamushinja kuba yariyemeye akananiza uyu muraperi, hari amakuru avuga ko atari uko byagenze.
Mu kiganiro aherutse kugirana na Radio Rwanda, Danny Nanone yagize ati “Bavuze ko Bruce Melodie twakoranye indirimbo nyuma akabura umwanya akampemukira, ariko si ko byagenze […] ntabwo twigeze dukorana indirimbo.”
Danny Nanone yavuze ko Bruce Melodie yagiye kuri studio yumva umushinga w’indirimbo ye, arayikunda ndetse yifuza gushyiramo inyikirizo ndetse birakorwa.
Ku rundi ruhande uyu muraperi yavuze ko bitewe n’uko uyu mushinga yari yawupanze Bruce Melodie atarimo, atigeze yemera ko ibyo yari yaririmbye biguma mu ndirimbo ye bityo hafatwa umwanzuro w’uko bivanwamo.
Kugeza ubu indirimbo ‘My type’ ni imwe mu zigezweho muri iyi minsi, ikomeje kuzamura imibare y’abayirebye cyane ko mu byumweru bitatu gusa imaze kurebwa n’abarenga ibihumbi 700 ku rubuga rwa Youtube.
My type, ni indirimbo ya kane Danny Nanone akoze kuva yakwiyemeza kongera gusubukura ibikorwa bya muzika nyuma y’igihe kinini yari amaze akurikira amasomo mu ishuri rya muzika rya Nyundo.
