Kapiteni w’Ikipe y’Igihugu ya Volleyball y’Abagore wakiniraga ikipe ya APR WVC, Munezero Valentine, yamaze kubona ikipe nshya ya Club Sfaxien mu Cyiciro cya Mbere muri Tunisia. Uyu munyarwandakazi amaze kwandika amateka mu kwitwara neza muri uyu mukino bigatuma agarukwaho kenshi nyuma yo kumukundira imikinire ye hakiyongeraho n’ubwiza bwe n’imiterere bigaragarira mu buryo aberwamo.
Munezero Valentine w’imyaka 23 y’amavuko kuko yabonye izuba tariki ya 01 Nyakanga 2000 ,ni umwe mu bakinnyi b’ikipe y’igihugu bitwaye neza mu gikombe cy’Afurika giheruka kubera muri Cameroun aho yafashije u Rwanda gusoza ku mwanya wa kane, umwanya rwabonye bwa mu mateka yarwo.
Ukwitwara neza muri iki gikombe aho yabaye umukinnyi mwiza warushije abandi gukora serivise nziza “Best Server” byahesheje Munezero ukina ku mwanya uzwi mu kibuga mu mukino wa Volley Ball nka ‘Outside Hitter’ kuba yabona ikipe muri Tunisia.
Kuri uyu wa Kane tariki ya 5 Ukwakira 2023 nibwo yafashe rutemikirere yerekeza muri Tunisia mu ikipe ya Sfaxien mu gihe kingana n’umwaka , maze uyu mukobwa w’uburebure bungana na 182 cm asezera muri APR WVC atyo.
Yerekeje muri iyi kipe ikina mu cyiciro cya mbere muri Tunisia nyuma y’imyaka 5 akinira APR yagezemo avuye muri IPRC Kigali. Muri icyo gihe amaze muri uyu mukino yakomeje kugenda azamura urukundo rw’abafana n’abamukunda bakaba benshi kubera imyitwarire ye mu kibuga ndetse n’uko agaragara mu bundi buzima busanzwe haba mu mafoto ashyira hanze no kumubona.
Aya rero niyo mafoto 20 twabahitiyemo ngo mwihere ijisho uyu mukobwa mwiza ukomeje kuzamura ibendera ry’igihugu mu mukino wa Volley Ball y’Abagore yatumye yerekeza muri Tunisia.
