Umusore uri mu bahanzi bagezweho kandi bakundwa na benshi barimo igitsinagore Kayigi Andy Dick Fred [Andy Bumuntu] ukundirwa imiririmbire n’imyandikire ye, yagarutse ku bintu bibiri yifuza ku mukobwa wazavamo umugore umubereye ubwo yari mu kiganiro asanzwe akora cya Kiss Breakfast.
Andy Bumuntu w’imyaka 28 yavuze ko mbere na mbere umukobwa yifuzako yazamubera umugore umukwiriye agomba kuba ibisabwa birimo kubaha no gukora cyane.
Yagize Ati “Ni ibintu bibiri ikintu cya mbere ni ukubaha ndavuga umuntu wiyubaha akubaha n’umuntu babana.” “Icya kabiri ni ukora cyane, kuba uri umuntu ubyuka mu gitondo ukifuza iterambere, njyewe ndakora cyane ndifuza umuntu nawe ufite inzozi ze kugira ngo mubere ikibatsi nawe ambere ikibatsi. Ni wa muntu ubyuka mu gitondo afite intego cyangwa inzozi zo kuba igihangange.”
Andy Bumuntu yakomeje avuga ko iby’uko umuntu asa inyuma atabirebaho cyane. Ati “Uko umuntu asa inyuma ni cyo kintu kiza nyuma y’ibindi, kenshi na kenshi usanga abasore berekana abakobwa bakunda ariko umugore wawe wihitiyemo usanga atandukanye n’abo bakobwa.”
Uyu muhanzi umaze imyaka irindwi amuritse indirimbo ye ya mbere, kugeza ubu nta mukobwa aratangaza nk’umukunzi we. Andy Bumuntu ni umwe mu bahanzi barangwa n’indirimbo zuje amagambo meza y’urukundo mu njyana ya Blues ahuza na gakondo nyarwanda, bituma yigarurira imitima ya benshi mu bakobwa bakunda muzika.
