Ikipe ya Espoir Fc yo mu karere ka Rusizi, yamaze kumenyesha abatoza bayo babiri, ndetse n’abandi bakinnyi ivuga ko batatanze umusaruro muri uyu mwaka w’imikino
Nyuma y’aho ikipe ya Espoir igowe na shampiyona y’icyiciro cya mbere uyu mwaka, aho iyi kipe yayisoje iri ku mwanya wa 14 n’amanota 17 n’umwenda w’ibitego 20, byatumye iyi kipe yisuzuma isezerera bamwe ivuga ko batatanze umusaruro bari bitezweho uyu mwaka.
- Ikipe ya Espoir yasezereye abatoza na bamwe mu bakinnyi ivuga ko batatanze umusaruro
Muri aba baszerewe, harimo umutoza mukuru Rukundo Jean de Dieu ndetse n’umutoza wari umwungirije Saidi Abed Makassi, aba bakaba baragiye bahagarikwa inshuro zitandukanye na bwo bashinjwa umusaruro muke.
Amakuru atugeraho kugeza ubu, ni uko umutoza Gatera Moussa wigeze no gutoza amakipe nk’Isonga, Gasogi akanungiriza muri Rayon Sports, yamaze kumvikana n’ubuyobozi bwa Espoir Fc ko ari we ugomba kuyibera umutoza mukuru mu mwaka w’imikino 2020/2021.
Iyi kipe kandi yanasezereye bamwe mu bakinnyi harimo n’abari bamazemo iminsi barimo Mutombo Govin, Renzaho Hussein Yongo, Bonfils, Kayiranga Eric, Niyitanga Youssuf , Gatoto Serge, Amidou Abdallah, Uwineza Jean De Dieu.
