Umutoza Guy Bukasa wari umaze umwaka atoza ikipe ya Gasogi United, yamaze gusinya mu ikipe ya Rayon Sports
Ku mugoroba wo ku wa Gatatu tariki 01/07/2020 ni bwo ikipe ya Rayon Sports yagiranye ibiganiro na Guy Bukasa wari usanzwe atoza ikipe ya Gasogi United.
Mu gitondo cyo kuri uyu wa Kane ni bwo ikipe ya Rayon Sports yaje gusoza ibiganiro yagiranaga n’uyu mutoza, asinyira kuzayibera umutoza mu gihe cy’umwaka umwe w’imikino
Uyu mutoza usanzwe ahembwa amafaranga 1500$ buri kwezi, ikipe ya Rayon Sports yemeye kuzajya imuha 4,000$, akazizanira n’umutoza wari usanzwe umwungirije mu ikipe ya Gasogi United.
Ikipe ya Rayon Sports kandi ku munsi w’ejo yari yanasinyishije umunyezamu Kwizera Olivier na we wakiniraga ikipe ya Gasogi United.
Mu kiganiro n’itangazamakuru cyari cyateguwe na Gasogi United, uyu mutoza yari yemeje ko yagiranye ibiganiro na Rayon Sports ariko atarasinya, gusa amakuru yizewe yageraga kuri Kigali Today ni uko uyu mutoza yagiye muri iki kiganiro yamaze gusinya amasezerano.
- Guy Bukasa ubu ni umutoza wa Rayon Sports bidasubirwaho
