Shampiyona y’u Bwongereza ikundwa na benshi ku Isi yose yaraye itangiye mu mwaka w’imikino wa 2022/23, aho Arsenal FC yatangiye itanga ibyishimo ku bakunzi bayo igatsinda Crystal Palace ibitego 2-0.
Ni umukino wabereye kuri stade ya Selhurst Park ku kibuga cya Crystal Palace watangiye ku isaha ya saa tatu z’ijoro ryo kuwa 5 Kanama 2022.
Crystal Palace ni umwe mu makipe akunda kugora Arsenal ariko iri joro ntabwo yorohewe kuko abasore b’umutoza Mikel Arteta bitwaye neza muri uyu mukino bagakomereza ku ntsinzi bakuye mu mikino yo kwitegura.
Ku munota wa 20 nibwo hatewe koruneri ishyirwa ku mutwe na Oleksandr Zinchenko awuhereza Gabriel Martinelli, nawe ntiyazuyaza ahita aba umukinnyi utsinze igitego cya mbere muri shampiyona y’u Bwongereza mu mwaka wa 2022/23.
Ikipe ya Crystal Palace n’umutoza wayo Patrick Vieira bagerageje gusatirana imbaraga nyinshi mu gice cya kabiri ariko biba iby’ubusa kuko abasore ba Arsenal bari bahagaze neza mu bwugarizi.
Mu mpera z’umukino ku munota wa 85, Marc Guehi wa Crystal Palace yitsinze igitego ku mupira watewe na Bukayo Saka, na we uhanzwe amaso n’abafana ba Arsenal uyu mwaka.
Umukino warangiye ikipe ya Arsenal ifite ibitego bibiri ku busa. Indi mikino iteganyijwe kuri uyu wa Gatandatu tariki ya 6 Kanama 2022 ni aho Fulham ikina na Liverpool, AFC Bournemouth na Aston Villa, Leeds United na Wolverhampton Wanderers, Newcastle United na Nottingham Forest, Tottenham Hotspur na Southampton, Everton na Chelsea.
Ejo ku Cyumweru Leicester City izakina na Brentford, Manchester United na Brighton & Hove Albion, West Ham United na Manchester City.
