Ibihugu bitandukanye bimaze iminsi byarashyize imbaraga mu gushaka urukingo rw’icyorezo cya COVID-19 kuko ari yo ntwaro ikomeye yo gutsinda icyo cyorezo.
Urukingo rwa kane rwemerewe gutangira gukorerwa igerageza (clinical trial) ku itariki 28 Mata 2020, mu gihe izindi eshatu zo zamaze kugera mu cyiciro cya kabiri cy’igeragezwa (phase two clinical trials).
Itangazo ry’uko urukingo rwa kane rwatangira gukorerwa igerageza risohotse mu gihe umuyobozi wo mu rwego rw’ubuzima aho mu Bushinwa yatangaje ko u Bushinwa bushobora kubona urukingo rwa mbere rwa Coronavirus rutunganye rwanahita rukoreshwa, muri Nzeri uyu mwaka wa 2020.
Urwo rukingo rushya rwatangiye gukorerwa igerageza, rwakozwe n’ishami ry’ikigo cyitwa ‘China Biotec Group’ ry’i Beijing, abashakatsi barukoze bavuga ko ruramutse rwemewe, uruganda rwabo rwaba rufite ubushobozi bwo kuzakora inkingo zigera kuri miliyoni 100.
Abashakashatsi mu by’inkingo aho mu Bushinwa, harimo abo mu kigo cyitwa ‘Sinovac Biotech’,bavuga ko hari urukingo rwari rugeze ku rwego rwo gutangira gukorerwa igerageza ku bantu, ariko ikibazo barimo guhura na cyo muri iki gihe ngo ni uko umubare w’abarwaye Coronavirus mu Bushinwa wagabanutse bityo kubona abakorerabushake bemera kugeragerezwaho urukingo bigoye, kandi bisaba ko rugeragerezwa ku bantu benshi.
U Budage
Mu Budage ho, nk’uko bitangazwa na Ugur Sahin, umuyobozi wa Laboratwari y’Abadage witwa BioNTech, igerageza ry’urukingo bakoze, rikorewe ku bantu rigomba gukorwa mu mpera z’uku kwezi kwa Mata, nyuma ibizavamo bikazatangarizwa isi muri Nyakanga uyu mwaka.
Igeragezwa rizabanza gukorerwa ku bantu 200 babyemeye ku bushake bwabo (volunteers)bafite imyaka hagati 18 na 55.
Mu Bwongereza
Mu Bwongereza, igerageza ry’urukingo rwakozwe n’abashakashatsi bo muri Kaminuza ya Oxford, ariko barebererwa cyane na Guverinoma y’u Bwongereza ryatangiye ku itariki 23 Mata 2020, rigomba gukorerwa ku bantu 1,100 bari hagati y’imyaka 18 na 55.
Abakorerwaho igerageza bagomba kuba bafite imyaka hagati ya 18 na 55, nta ndwara basanganywe, kandi batarigeze barwara Coronavirus.
Abagore batwite, abitegura gutwita, abonsa, cyangwa se abigeze gukorerwaho igerageza ry’urundi rukingo bo ntibemerewe gukorerwaho igerageza, nk’uko bisonurwa ku rubuga rwa Internet www.Contagionlive.com .
Mu Bwongereza, bateganya ko ibisubizo by’iryo gerageza bishobora gufata hagati y’amezi abiri kugeza kuri atandatu. Ubu harakorwa inkingo zigera kuri miliyoni, kugira ngo uru rukingo niruramuka rugeze ku ntego zarwo, rukemerwa, ruzahite rukwirakwizwa henshi ku buryo bwihuse.
Madagascar
Muri Madagascar naho havuzwe iby’ikinyobwa gikorwa mu byatsi kivura Coronavirus nk’uko byatangajwe na Perezida w’icyo gihugu Andry Rajoelina, kuri televiziyo y’icyo gihugu.
Yagize ati,”Icyo dushaka gukora uyu munsi, ni ukumenyekanisha iki kinyobwa, kikarinda abaturage bacu”.
Icyo kinyobwa Perezida wa Madagascar yavuze ko cyakijije abantu babiri Coronavirus ndetse ngo cyorohereza n’abandi bari bafite ibimenyetso byayo.
Ibyo byatumye icyo kinyobwa gihabwa abanyeshuri bagombaga gutangira amashuri basabwa kubanza kunywa kuri icyo kinyobwa kugira ngo kibarinde, ku buryo no mu bice by’icyaro hari imiryango ikennye yahawe icyo kinyobwa ku buntu.
Gusa nubwo bimeze bityo, nta geregeza ry’icyo kinyobwa rishingiye kuri siyansi ryigeze rikorwa, cyangwa se ngo ryemezwe n’ishami ry’umuryango w’abibumye ryita ku buzima ko ari umuti wa Coronavirus, iyo akaba ari yo mpamvu inzobere mu by’ubuzima zitandukanye zamaganye ikoreshwa ry’icyo kinyobwa nk’umuti wa Coronavirus.
Muri Amerika haravugwa umuti witwa ‘Remdesivir’
Muri Leta zunze ubumwe za Amerika nk’uko bivugwa n’inzobere mu by’ubuzima muri icyo gihugu Dr Anthony Fauci, umuti witwa ‘Remdesivir’ ngo uratanga icyizere. Nk’uko byagarutsweho n’ibitangazamakuru bitandukanye birimo CNN, The Guardian na BBC.
Ibyo byavuzwe ku wa gatatu w’iki cyumweru, ubwo uwo muganga w’inzobere mu bijyanye n’indwara ziterwa na virus, Dr Anthony Fauci, yavugaga ko ibisubizo biva mu ivuriro rimwe ririmo gukorerwamo igerageza, bigaragaza ko umuti wa ‘Remdesivir’ ugabanya cyane igihe gukira byafataga.
Ubushakashatsi bwakozwe n’ikigo cyitwa ‘Gilead’ butewe inkunga n’ikigo gishinzwe kurwanya indwara zitandukanye harimo n’iziterwa na Virus muri Amerika, mu igerageza ryakorewe ku barwayi 1.000 bwagaragaje ko abarwayi bahawe uwo muti wa ‘Remdesivir’ batangiye koroherwa ku mpuzandengo(average) y’iminsi nibura 11 mu gihe abatahawe uwo muti, bo ngo boroherwa nibura ku mpuzandengo y’iminsi 15.
Uwo muti kandi wa Remdesivir usanzwe ukoreshwa mu kuvura Ebola, nyuma rero yo gukorerwa igeragezwa ku barwayi ba Coronavirus byagaragaye ko ugabanya igihe koroherwa byafataga biva ku minsi 15 bigera kuri 11.
