Mu Kinyarwanda baca umugani bati “Aho ifaranga rikubise haroroha” bisobanura ko nta kidashoboka imbere y’amafaranga.Ninde wari uzi ko Juno Kizigenza na Ariel Wayz bashobora kongera gukorana indirimbo nyuma y’uko iby’urukundo rwabo bijemo kidobya?
Wigeze utekereza ko aba bombi bashobora kongera guhura nyuma yo gutongana wabonye ku mbuga nkoranyambaga? Ninde wari uzi ibi bintu? Wenda icyo benshi batekerezaga kwari ugukomeza gukora indirimbo buri umwe avuga undi. Juno yakoze “Urakunda” Ariel Wayz akora “Good Luck”
Niba uri mu batekerezaga ko ibi bidashoboka byarabaye! Ariko se byagenze gute?
Mu Kiganiro Breakfast With The Star kuri KISS FM, Juno Kizigeza yahishuye ko hari indirimbo yakoranye na Ariel Wayz nyuma yo gutandukana.
Iyi ndirimbo nubwo bayikoze ntabwo ari iyo kwiyunga, ahubwo ni ikiraka bahawe n’Ikigo cy’Igihugu cy’ibarurisha mibare mu rwego rwo kwamamaza igikorwa cy’Ibarura rusange ry’abaturage n’imiturire.
Juno Kizigenza yavuze ko nubwo iyi ndirimbo irimo ijwi n’irya Ariel Wayz, batigeze bahurira muri Studio n’umunsi umwe.
Ati “Ntabwo twigeze duhurira muri studio, biri ni business kandi nyuma y’ibyabaye akazi kagomba gukomeza. Yumvikanye akwe nanjye numvikana ukwanjye, apanga na Pastor P ukwe.”
Juno Kizigeza avuga aticuka kuba yaratandukanye na Ariel Wayz ariko ngo nta wamenya ibihe byongeye kubahuza nabyo ntiyabyicuza.
Ariel Wayz na Juno Kizigenza bahuriye mu ndirimbo yitwa Away yakunzwe na cyane mu mwaka ushize ndetse yabaye intandaro y’urukundo rwabo rutarambye.
Juno Kizigenza na Ariel Wayz bakoranye indirimbo ishishikariza abantu kujya kwibaruza , yumve hasi!
