Perezida wa Kenya Uhuru Kenyatta mbere y’uko ibi bitangazwa yari yabwiye Abanyakenya ko ahangayikishijwe bikomeye n’uburyo imibare y’abandura ikomeje kwiyongera umunsi ku wundi muri Kenya, ndetse ko nta n’icyizere ko iyi virusi izagabanya umuvuduko ifite mu gukwirakwira muri ibi byumweru biri imbere.
- Haravugwa icyorezo cya COVID-19 mu bagororwa muri Kenya (Ifoto: BBC)
Abagororwa 31 ni bo bamaze kumenyakana ko banduye covid-19. Babonetse mu bikorwa rusange byo gupima bikomeje mu gihugu.
Babonetse kandi nyuma y’aho abagororwa 59 boherejwe ku bigo nderabuzima byo mu murwa mukuru Nairobi kugira ngo bapimwe iki cyorezo nyuma y’uko bari bamaze iminsi 21 mu kato nyuma y’uko bari bavuye mu rukiko gusomerwa imyanzuro ku byaha binyuranye bashinjwa.
Komiseri mukuru wa gereza, Wycliffe Ogallo, yatangaje ko bafashe ingamba zo gukumira ikwirakwizwa rya virusi muri za kasho zirenga 129 mu gihugu hose.
Ni mu gihe amagereza yo muri Kenya asanzwe azwiho kugira ubucucike bw’imfungwa ugereranyije n’umubare gereza ziba zigomba kwakira.
Guverinoma iherutse kurekura imfungwa 11,000 zari zifunzwe zizira ibyaha byoroheje kugira ngo irwanye ikwirakwizwa rya COVID-19.
Mu kiganiro cyanyujijwe kuri television ya NTV, Perezida Uhuru Kenyatta yavuze ko impuguke ziteganya ko iyi virusi izagabanuka muri Kenya hagati yo mu mezi ya Kanama na Nzeri 2020; kandi asaba ko buri muntu agira uruhare mu kurwanya iki cyorezo.
Muri Kenya, imibare yashyizwe ahagaragara kuri uyu wa mbere tariki 01 Kamena 2020 yerekana ko abamaze kurwara Covid-19 ari abantu 2,021. Muri, abakize ni 482 naho abapfuye ni 69.
