Minisitiri w’Ubukungu muri Repubulika iharanira Demokarasi ya Congo, Acacia Bandubola, yasuzumwe abaganga bamusangamo virusi ya COVID-19.
- Minisitiri Acacia Bandubola n’umugabo we na we urwaye COVID-19 bashyizwe mu kato (Ifoto:Internet)
Mu gitondo kuri uyu wa Kane tariki ya 19 Werurwe 2020 nibwo ibizamini byagaragaje ko Minisitiri Acacia Bandubola afite virusi ya COVID-19 ahita ashyirwa mu kato n’umuryango we, ndetse hatangira gushakwa bamwe mu bayobozi bahuye na we ngo bapimwe.
Acacia Bandubola yagaragaje ubwandu mu masaha 48 apimwe, akaba akurikiye umuvandimwe we wari ushinzwe ibiro bye wagaragaje ubwandu tariki ya 17 Werurwe ndetse aba umuntu wa karindwi wagaragayeho icyorezo cya COVID-19 muri RDC.
Muri RDC abantu 14 ni bo bamaze kugaragaraho icyorezo cya COVID 19 ikaba yabaye impamvu yatumye Perezida Félix Tshisekedi ahita ahagarika ingendo z’indege ziva mu bihugu byagaragayemo COVID-19, guhagarika ibirori n’amateraniro, amashuri n’ibindi bikorwa bihuza abantu benshi.
Ishami ry’Umuryango w’Abibumbye ryita ku buzima (OMS) rigaragaza ko kugera tariki ya 18 Werurwe 2020 abantu bamaze kwandura COVID-19 ari 227,495 mu bihugu 176, imaze guhitana 9,303, naho abamaze kuvurwa bagakira ni 85,961.
Rigaragaza ko mu barwayi 132,231 barimo kuvurwa abari mu bihe bitagoye ari 125,335 (95%) naho abari mu bihe bikomeye ari 6,896 (5%), naho mu barwayi bamaze kuvurwa 95,264 muri bo 85,961 (90%) barakize naho 9,303 (10%) barapfa.
Ibihugu bitatu byabonetsemo umubare munini w’abagezweho n’iki cyorezo kurusha ibindi ubu ni u Bushinwa 80,894, u Butaliyani 35,713 na Irani 17,361.
Ku mugabane wa Afurika, mu gihugu cya Algeria icyorezo cya COVID-19 kimaze guhitana abantu babiri, naho igihugu cya Afurika gifite abarwayi benshi ni Misiri ifite abarwayi 210, ikurikirwa na Afurika y’Epfo ifite abarwayi 150 na Algeria ifite abarwayi 82.
