Nyuma y’igihe sinema nyarwanda bayicira akarurutega ngo ntibashoboye , kuri ubu hasohotse firime idasanzwe ije kwerekana ko byose bishoboka bitewe n’uburyo abayikoze bayitondeye.
Uruhando rwa sinema mu Rwanda ubusanzwe ntiruvugwaho rumwe kubera ibikorwa bashyira hanze bitujuje ubushobozi bwo kujya ku rwego mpuzamahanga , ariko akenshi biba byaturutse kubayiteguye ubushobozi baba bashyizemo haba muby’ubumenyi ndetse n’amafaranga , gusa “Killer Music , Chapter 1: Blood Bad , The Saga” ije ifite umwihariko udasanzwe kubera imbaraga ziyirimo.
Iyi firime irimo imbaraga kuko yakozwe n’umugabo ukomeye uzwiho kuba amenyereye ibijyanye n’impano , umuyobozi w’ishuri rikuru rya muzika rya Nyundo witwa Muligande Jacques uzwi nka Mighty Popo , wafatanyije n’umuhinde ukora sinema witwa Anirban Mitra bafatanyije kuyobora firime “Killer Music , Chapter 1: Blood Bad , The Saga” kuva itangiye kugeza irangiye.
Kuko gukina iyi firime bitari byoroshye bifashishije abakinnyi babona ko babifitiye ubushobozi , bituma bakorana n’abo mu bihugu bitandukanye nka Kenya ndetse na Uganda , gusa mu bantu 300 babonyemo akazi hakaba harimo abanyeshuri bo ku Nyundo , abanyamakuru , abahanzi , ababyinnyi ,ndetse n’abandi bafite aho bahuriye n’imyidagaduro.
Iyi filime kandi yagizwemo uruhare n’abarimo Nasser Naizi na Meddy Saleh bakozeho nka “Directors of Photography’’ mu gihe umuziki wumvikanamo yaba mu kuwucuranga no kuwandika uretse Mighty Popo, byagizwemo uruhare n’abandi barimo Clément Ishimwe wari wanitabiriye igikorwa, Joachim Mugengakamere uzwi nka The Major na Nehemiah Shema.
“Killer Music , Chapter 1: Blood Bad , The Saga” ni firime ivuga kuri muzika , aho igaragaramo ibibazo bikomeye umunyamuziki ashobora guhura nabyo , ibyishimo mu rukundo , kubabazwa , ibibera mu bitaramo , mu nzira ndetse n’ibindi byose biterwa nabo ari ndetse n’abo bari kumwe.
Irimo Urukundo , Ubwicanyi , Indirimbo , Ibitaramo , Imbunda ndetse n’ibindi byinshi biyiha ireme , gusa ikaba ifite umwihariko ku mashusho meza yitaweho kugeza ku rumuri rugaragaramo , amajwi akoze neza , ndetse n’abakinnyi bakozwe ibyo batojwe neza barabiryoshya.
Muligande Jacques uzwi nka Mighty Popo niwe nyiri gitekerezo cy’iyi firime.
Anirban Mitra ni umwe mubakoze byose bishoboka ngo iyi firime isohoke iri kurwego rwiza.
Indirimbo ziri muri iyi Firime zagizwemo uruhare na Ishimwe Clement wo muri Kina Music
Bamwe mu bantu ba hafi kuri Mighty Popo bagiye bamuha ibitekerezo ngo iyi firime ibe nziza.
Abanyamakuru n’abandi batandukanye bamurikiwe firime “Killer Music , Chapter 1: Blood Bad , The Saga”
Abenshi mu bakinnyi biganje muri iyi firime na abiga n’abize kwishuri rya muzika ry’u Rwanda rizwi nko ku Nyundo.
Uhereye iburyo Umuhanzikazi Lee Dia, Rwasibo uzwi mu bikorwa by’ubugeni ndetse na Neema Rehema ni bamwe mu bari bitabiriye igikorwa cyo kumurika iyi filime nshya ya Mighty Popo
