Minisiteri y’Ubuzima (MINISANTE) iratangaza ko kuri uyu wa Kabiri tariki 19 Gicurasi 2020 habonetse abarwayi bashya cumi n’umwe (11) ba COVID-19 bituma abamaze kuboneka mu Rwanda banduye icyo cyorezo bose hamwe baba 308.
Abo bantu cumi n’umwe babonetse mu bipimo 1217 byafashwe uyu munsi, ibipimo byose hamwe bimaze gufatwa bikaba ari 52,335 ari na byo byabonetsemo abarwayi 308.
Dr Sabin Nsanzimana uyobora ikigo gishinzwe ubuzima mu Rwanda (RBC), abinyujije kuri Twitter, yasobanuye ko abarwayi bagaragaye bashya uyu munsi ari abatwara amakamyo yambukiranya imipaka n’abo bakorana. Bose ngo bahise bashyirwa aho bakurikiranwa uko bikwiye bakimara kwinjira mu gihugu.
Itangazo rya Minisiteri y’Ubuzima riravuga ko abantu batandatu mu bari barwaye COVID-19 bakize kuri uyu wa Kabiri, abamaze gukira bose hamwe bakaba ari 209.
Abakirwaye COVID-19 mu Rwanda ni 99, kugeza kuri uyu wa Kabiri icyo cyorezo kikaba nta muntu kirahitana mu Rwanda.
