Minisiteri y’Ubuzima yatangaje ko kuri uyu wa Gatanu tariki 17 Nzeri 2020, mu Rwanda abantu babiri byishwe na COVID-19.
Abo babiri bishwe na COVID-19 ni Abanyarwanda umwe w’imyaka 80 n’undi w’imyaka 29 y’amavuko bitabye Imana bari i Kigali.
Mbere yaho ku wa Kane undi mugabo w’imyaka 48 y’amavuko na we yitabye Imana ari i Kigali, abamaze kwicwa na COVID-19 mu Rwanda bose hamwe bakaba ari 25.
Abantu mu Rwanda bongeye kwicwa n’iki cyorezo mu gihe hari hashize iminsi irindwi nta muntu bivugwa ko yishwe na COVID-19 mu Rwanda, dore ko uwaherukaga kwicwa n’icyo cyorezo ari umubyeyi w’imyaka 62 witabye Imana i Kigali ku wa Kane tariki 10 Nzeri 2020.
Minisiteri y’Ubuzima kandi yatangaje ko kuri uyu wa Gatanu habonetse abantu 18 bashya banduye icyorezo cya COVID-19, mu gihe abandi 28 bakize. Mbere yaho ku wa Kane hari habonetse abarwayi bashya 19, abakize nabwo bari 28.
Abo barwayi bashya 18 babonetse mu bipimo 1,549 bakaba barimo 9 babonetse muri Kigali (bapimwe mu bibasiwe kurusha abandi), naho abandi 4 baboneka muri Nyamagabe, i Rubavu na ho habonetse 4, undi umwe aboneka i Bugesera.
Kugeza kuri uyu wa Gatanu mu Rwanda abamaze kwandura icyo cyorezo ni 4,671 muri bo abamaze gukira ni 2,845 naho abakivurwa ni 1,801.
Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.
