Minisiteri y’Ubuzima mu Rwanda iratangaza ko kuri uyu wa Kane tariki 16 Mata 2020, hagaragaye abandi bantu babiri barwaye Coronavirus mu bipimo 664 byafashwe mu masaha 24 ashize. Ibi byatumye umubare w’abagaragayeho Coronavirus mu Rwanda ugera kuri 138 (muri aba 60 barakize, hakaba harimo 6 bakize mu masaha 24 ashize).
Itangazo rya Minisiteri y’Ubuzima riravuga ko muri abo bantu babiri, harimo umwe byamenyekanye ko yahuye n’abandi barwaye Coronavirus mu Rwanda, n’undi uherutse kugirira ingendo mu mahanga.
Iryo tangazo rivuga ko abagaragaweho Coronavirus bose bahise bashyirwa mu kato, hakaba hakomeje ibikorwa byo gushakisha abantu bose bahuye na we kugira ngo basuzumwe ndetse bitabweho n’inzego z’ubuzima.
Minisiteri y’Ubuzima iributsa ko umuntu wese uhisha cyangwa wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byayo, aba ashyize ubuzima bwa benshi mu kaga kandi abihanirwa n’amategeko.
Abarwayi bose bakomeje kuvurirwa ahantu habugenewe, kandi ngo barimo koroherwa. Abenshi muri bo ubu ngo nta bimenyetso bya Coronavirus bagaragaza, ndetse ngo nta n’umwe urembye, nk’uko itangazo rya Minisiteri y’Ubuzima ribivuga.
