Parezida wa Repubulika y’u Rwanda Paul Kagame yatangaje ko yagiranye ibiganiro kuri telefone na Minisitiri w’Intebe w’u Buhinde Narendra Modi. Ibyo biganiro byibanze ku mubano w’ibihugu byombi, baganira no ku bufasha u Buhinde bukomeje guha u Rwanda.
Perezida Kagame abinyujije kuri Twitter, yagize ati “Namushimiye ubufasha mu by’ubuvuzi n’ibikoresho u Buhinde bwageneye u Rwanda mu guhangana n’icyorezo cya COVID-19. Iyo nkunga twarayishimye cyane.”
Had a very good call with my friend PM @narendramodi. We discussed our historically good relationship and the support India continues to offer us. I thanked him for the medical supplies&equipments India donated to Rwanda in this fight against #Covid19. It is very much appreciated
— Paul Kagame (@PaulKagame) June 5, 2020
Minisitiri w’Intebe w’u Buhinde, Narendra Modi, na we mu butumwa yanyujije kuri Twitter, yashimiye ‘inshuti ye’ Perezida Kagame, amushimira by’umwihariko ingamba u Rwanda rwafashe zatumye rubasha guhangana n’icyorezo cya COVID-19.
Narendra Modi ati “U Buhinde butewe ishema no gushyigikira ingufu zanyu, atari mu guhangana na COVID-19 gusa, ahubwo no mu bindi bikorwa bikomeje kwihutisha iterambere ry’u Rwanda.”
Narendra Modi yongeyeho ko u Rwanda ari inkingi y’ingenzi kandi ko ruzakomeza kugira uruhare rukomeye mu mubano w’u Buhinde na Afurika.
Thank you, my friend President @PaulKagame.
Rwanda has managed the COVID-19 crisis effectively under your leadership. India is honoured to support your efforts, not only for fighting the pandemic but also for advancing Rwanda’s impressive development story. https://t.co/WnSaNfZU15
— Narendra Modi (@narendramodi) June 5, 2020
Muri Nyakanga 2018 nibwo Minisitiri w’Intebe w’u Buhinde Narendra Modi yagiriye uruzinduko rw’amateka mu Rwanda, icyo gihe akaba yarakiriwe ku kibuga cy’indege cya Kanombe na Perezida wa Repubulika Paul Kagame.
Mu ruzinduko rw’uwo muyobozi, ibihugu byombi byashyize umukono ku masezerano y’ubufatanye mu nzego zitandukanye zigamije iterambere ry’ibihugu byombi zirimo, ubukungu, uburezi, ikoranabuhanga, itumanaho, ubuhinzi, umutekano, ubuvuzi n’ibindi.
Uwo muyobozi kandi yagiranye ibiganiro na Perezida wa Repubulika Paul Kagame, nyuma y’ibyo biganiro asura icyanya cyahariwe inganda (Special Economic Zone), aho bateganyaga kuzashora asaga miliyoni 100 z’Amadorari mu rwego rwo kwagura icyo cyanya.
Uwo muyobozi kandi yasuye Urwibutso rwa Jenoside rwa Kigali yunamira imibiri isaga ibihumbi 250 irushyinguyemo, nyuma agirana ibiganiro n’umuryango mugari w’Abahinde bakora ubucuruzi mu Rwanda ndetse n’itsinda ry’abashoramari baje bamuherekeje.
- Narendra Modi mu muhango wo gushyikiriza inka abaturage
Muri urwo ruzinduko rw’iminsi ibiri, Minisitiri w’intebe w’u Buhinde Narendra Modi, yerekeje no mu Karere ka Bugesera mu Murenge wa Rweru,agabira imiryango yimuriwe mu Mudugudu w’icyerekezo wa Rweru inka 200, muri Gahunda ya Girinka Munyarwanda.
Leta y’u Buhinde kandi ku wa 16 Mata 2019 yahaye u Rwanda impano y’imiti y’indwara z’umwijima, ifite agaciro ka Miliyoni 1,6$ ahwanye na miliyari 1 na miliyoni 400Frw.
