Polisi ya Uganda yataye muri yombi abantu barenga 160 ivuga ko barenze ku mategeko y’umukwabu y’uko nta kuva mu ngo kuva mu rukerera kugeza nimugoroba.
- Umupolisikazi ahagarika imodoka i Kampala (Photo:Internet)
Iyo ni imwe mu ngamba zafashwe na Leta y’iki gihugu mu kurwanya ikwirakwira ry’ubwandu bw’icyorezo cya coronavirus.
Abantu benshi baranafunzwe bazira gufungura amaduka yabo, binyuranyije n’amategeko ya Perezida Yoweri Museveni y’uko ubucuruzi butari ubw’ingenzi buhagarara.
Ibitangazamakuru byo muri Uganda byatangaje videwo zerekana abo batawe muri yombi bicaye hasi imbere y’ibiro bikuru bya Polisi mu murwa mukuru Kampala.
Ibyo byateye impungenge z’uko kwegeranya mu kivunge abo bacyekwaho kurenga ku mategeko, na byo binyuranyije n’amabwiriza yo kurwanya Covid-19 asaba abantu kutegerana.
Umuvugizi wa Polisi yabwiye BBC ko abo bose bakekwa bari babanje gushyirwaho igipimo hakarebwa uko ubushyuhe mu mubiri buhagaze.
Muri Uganda abantu 45 ni bo bamaze kwemezwa ko barwaye Covid-19 kugeza ubu.
Mu mpera y’ukwezi gushize ni bwo Perezida Museveni yatangaje ibihe bidasanzwe, nk’ingamba yo kurinda ikwirakwira rya coronavirus mu gihugu.
