Abaganga i Paris mu Bufaransa bemeje uruhinja rwa mbere rwavukanye covid-19 nyuma y’uko nyina amwanduje amutwite nk’uko bitangazwa mu bushakashatsi. Byemezwa y’uko ari ibintu biba gake.
- Umubyeyi wanduye Covid-19 ashobora kwanduza umwana ariko biba gake
Uru ruhinja rwatangiye kugaragaza ibimenyetsi bya covid-19 nyuma gato y’uko ruvuka muri Werurwe rukira mbere y’uko abaganga babona umuti. Ibimenyetso birimo kunanirwa guhumeka no kwangirika ku bwonko byagaragaye mu masaha 24 nyuma y’uko uru ruhinja ruvuka, byaje gukira nyuma y’ibyumweru bitatu.
Nyina wari ufite ibimeneyetso bya covid-19 igihe cyo kubyara na we yarakize kuri ubu. Uhagarariye abakoze ubu bushakashatsi Dr. Daniele De Luca mu kinyamakuru cyandika ku buvuzi ‘Nature communications’, yagize ati “Twagaragaje y’uko umubyeyi ashobora kwanduza umwana atwite mu cyumweru cya nyuma cy’inda”.
Uyu mwana yavutse nyina abazwe byatumye abaganga babasha kubika ingobyi kugira ngo babashe gupima bemeze ko ari covid-19 nk’uko Dr. De Luca yabisobanuye. Mu ngobyi ni ho covid-19 yari ari nyinshi bituma ica mu rureri igera ku mwana.
Marian Knight, umwalimu ku buzima bw’abana n’ababyeyi muri Kaminuza ya Oxford utarakoze kuri ubu bushakashatsi, yavuze ko ibi byabaye bishoboka gake ko uruhinja ruvutse ku mubyeyi urwaye covid-19 rugaragaza ibimenyetso rukivuka.
Inama yagiriye abagore batwite ni uko bakwirinda covid-19 bakaraba intoki no gusiga intera mu gihe bagiye ahari abantu benshi.
